台灣基督長老教會

中壢教會

主任牧師 : 陳克安 |教育牧師: 吳富仁
電話:(03)422-4354 & (03)4222425 (03)427-1863 
網址:www.chunglipc.org 地址:桃園市中壢區中平路124號
傳真:(03)425-3291 
EMAIL: chungli_pc@msa.hinet.net

20200112 吳富仁牧師 - 同心合一的勸勉

經文:哥林多前書1:10-17
題目:同心合一的勸勉

台灣的分裂

親愛的兄弟姊妹,大家平安!過去這幾個月,特別過去這幾日,台灣親像分作兩個世界。佇我的朋友內底,有支持兩黨的,我對因互我的訊息內底,會了解因的意向。有真多熱情的朋友,這幾日也煩惱,甚至煩惱到睏未去,所以我也會為因煩惱,假使昨暝這場選舉的結果出來以後,無親像因所期待的,若按呢,因會按怎呢?這場選舉,豈真正親像這些候選人的嘴所講的,是一個關鍵改變的時刻嗎?   

民主社會是透過百姓一票一票的選舉,推選出代表,台灣佇昨日咱會選出總統,立法委員及政黨;總是選舉是得著票較多的人當選,贏的人表面上是總拿,所以佇昨暝,咱攏見證著贏這場選舉的人──因的笑容;總是,佇這種狀況下,也互咱忽略輸的候選人及政黨,以及投因的人。台灣的選舉有時真互人起瘋ヽ抓狂,只要表明態度支持什麼人,尪某相爭,兄弟姊妹無講話,朋友也會無往來;因為佇台灣社會內底,有真嚴重意識型態認知的差別,若用色彩來分,有人就簡單分作藍色,綠色;還會分作深的,淺的;親像我作長老教會的牧師,就時常互人認作是綠色的,而且是深的。   

總是對台灣未來政治的主張及想像,攏只有一時;這些主張及想像,及台灣社會的演變,以及咱生命的所認知的歷史,有真深的關係;咱昨天投票的行為,投互什麼人,代表咱過去以來,所接收著的故事,及咱認為台灣應該行向的;這及咱的認同也有真深的關係;看著選舉結果,咱要承認,台灣社會就是認同頂頭分裂,真多選區當選的及落選的只有差幾千張或幾百張的選票而已;幸好台灣是民主社會,四冬後或是兩冬後,現在坐位掌權的人,也要再一遍,接受民意的檢驗;所以絕對呣是世界末日;無人呷意失敗,無人愛支持的人及政黨輸;幸好咱活佇民主政治運作的台灣,只要堅持這點,台灣就絕對及中國或是香港不同。   

昨暝咱也要注意,候選人佇台頂講話的節制;親像選舉前,我為台灣祈禱,選舉的現象雖然造成台灣的分裂,總是選舉後,咱要為同一個目標打拚,就是互台灣更加好,有更加廣闊台灣人的心及視野,換一句話來講,就是同心合一;事實上,這也是保羅佇這張寫互哥林多兄姊的批頂頭,頭一項交代的代誌。

莫得分黨   

「兄弟啊,今我對咱的主耶穌基督的名勸恁議論攏著相同。恁中間莫得有分黨,就是著一心一意,大家相契合。」(林前1:10)佇這張批的一開始,保羅是按呢講:「我時常為著恁啲感謝我的上帝,因為伊通過基督耶穌賜恁恩典,互恁通過基督逐項得著富足,充滿逐款口才及智識。」(林前1:4~5現代台語譯本)保羅佇伊的請安中,讚美哥林多的兄姊,因富足,充滿口才及智識;總是續接,保羅卻直接指責因中間分黨的代誌,就親像智慧的人講:「朋友造成的傷是出佇好意;對敵的唚嘴是虛假。」(箴27:6現代台語譯本)真正的好朋友,講話真直接,會造成咱內心的傷害,總是當咱冷靜落來想,就親像智慧的人所講的,有時對咱好嘴,咱講什麼攏應好的,不一定是咱的朋友,有可能是咱的對敵,也無的確。   

現代台語翻作「兄弟姊妹,我奉咱的主耶穌基督的名勸恁大家,講話著一致;恁中間嘛呣通分裂。著團結,有像款的想法及共同的目標。」保羅的這段話,互我想起佇日本時代受關十幾遍,創辦台灣文化協會及台灣民眾黨的蔣渭水曾講的一句話:「同胞須團結,團結真有力!」保羅就是欲對裀表達這種意思;恁中間豈採對代誌的看法有無同款意見,總是要因為耶穌基督,要團結。分黨原文有裂開的材或剖開的土,確實當時使用佇政治的語言。保羅勸因,呣通再分彼此,要記得咱有共款的所在。用台灣來講,咱作夥活佇這塊土地,同領有中華民國的身份證,享受這個國家的權利與義務。當保羅寫這張批的時,人有可能是佇以弗所,伊若會知哥林多教會發生的代誌呢?「我的兄弟啊,是革來氏家內的人曾給我講,恁中間有相爭。我的意思是恁逐人有teh講:『我屬保羅』;『我屬亞波羅』;『我屬磯法』;『我屬基督』。」(林前1:11~12)原來有人去報伊知。哥林多教會是保羅佇第二擺巡迴佈道中建立的,照使徒行傳記載,保佇這個城市停十八個月;革來氏這位姊妹,應該就是哥林多教會內底保羅親密的同工,伊家內的人,到以弗所,報互保羅知;因為按呢,保羅才佇這張批一開始,就指責因,按怎恁中間欲分黨呢?而且分的理由真奇怪。

基督無分開   

「基督豈有分開嗎?保羅豈替恁釘十字架嗎?抑是恁曾受洗禮歸佇保羅的名嗎?」(林前1:13)佇哥林多教會的兄姊中,用家己恰意的傳教者或是為家己洗禮的牧者,作因分黨的根據。所以當時的哥林多教會,豈採有保羅黨,亞波羅黨,彼得黨,還有一黨,想欲表明家己的靈性較高,所以稱作基督黨。保羅真無客氣問因,我也無替恁釘十字架!恁洗禮並無歸佇我的名。親愛的兄姊,佇教會內底,咱確實會及某一些兄姊較親密、較好,咱會及講話、個性、脾氣較接近人親密,這是人性;總是咱卻要記得,當咱信耶穌基督以後,咱所領受的,以及咱的生命所反映出來的,並無兩套標準。   

和合本翻譯,保羅向哥林多的兄姊請安,稱因作「在基督耶穌裡成聖、蒙召作聖徒的,」(林前1:2)這是保羅照舊約的信仰傳統,強調信的人的聖潔,佇利未記內底,上帝的命令一直出現,要咱聖潔,這呣是指身軀洗幾遍,更加指一個污穢的人,對上帝恩典所作的回應,這個回應是透過人的生命對這世界,以及對人的憐憫及慈悲中展現出來;所保羅才會受氣,恁無應該分黨,因為恁已經屬佇耶穌基督肢體中的一份子,若按呢就要相顧相疼。「感謝上帝,佇基利司布、該猶以外,我未曾給恁一人行洗禮,免得人講,恁受洗禮歸佇我的名。我也給司提反阿一家的人行洗禮,其餘有給別人行洗禮抑無,我卻boe記得。」(林前1:14~16)初代教會的洗禮,神學家猜測,真可能是奉「耶穌基督的名」,或是「聖子聖神的名」,因為三一上帝是後來的代,總是無一個宣教師是奉家己的名為人受洗,保羅回想,伊boe記得曾為多少人行洗禮,總是這並無要緊。

基督是咱的和平   

什麼是保羅認為要緊的呢?伊佇以弗所書寫講,「基督促進咱的和平;伊有互猶太人及外邦人成做一個。伊用家己的身軀拆毀給因隔開的牆,消除因中間的敵對。伊廢除猶太律法的誡命及規例,互兩旁通過伊通創造一個新的人來促進和平。」(弗2:14~15)保羅揀這字「和平」來形容什麼是「教會」,耶穌是咱的和平,因為祂,彼此生份,咱仍能合一,因為祂,已經廢除用上帝律法規矩竪起來的牆,過去佇因中間,分作猶太人、外邦人,在台灣,咱分作福州人、漳州人、客人、外省人、原住民,來表達咱的屬性及認同,總是當咱屬於祂,咱兩邊就是對敵,猶原要造成一個新的人,這就叫做教會。因為耶穌每一項作為,欲幫助咱,更加深入了解,什麼是教會,祂是咱合一惟一的原因、互咱明白家己是新創造的人、及上帝和好。相時成就和平,需要付上代價,主耶穌就做成這個行動,為咱付上代價。   

總是教會是用基督為頭,耶穌基督是教會的第一塊基礎的石磐,是按怎教會呣是世界上最和平的所在?當咱來到教會,目睭所看見的,仍然是一群吵吵鬧鬧烏合之眾呢?有三個原因;

代先,耶穌是人。所以,真正的和平是有人性的,不是寫一個策略、計劃或命令來達成的,和平需要聖神,聖神導咱開始有分於祂的生命,真正的和平那時才能在咱中間展開。   

第二,耶穌尊重咱是人,活在一個現實的世界內底。祂明白這個現實的世界,人與人中間,就是會彼此傷害、相刣、結冤仇,總是呣是用武器去刣死那些對你抗議的人,將抗議的聲隔絕,將對敵你的人掛佇木頭頂燒死,詛咒因,講因攏歹人,按呢就解決問題,就通達成和平。呣是!主耶穌邀請咱,參與在祂所帶來的和平內底,就是咱要放手,互祂佇咱生命作工,祂將導咱進入一個彼此連結,有親密關係、有疼的生命共同體內底。   

第三,主耶穌為咱成就和平的方法,就是祂用家己的生命作活祭,成就這個和平。換一句話來講,互教會成作教會,沒第二條路,就是要學像耶穌的獻祭──祂用釘佇十字架上的方式,來成就和平。咱若要成就這個和平,也要學祂模樣,用看無家己、為疼願意放拺性命的方式來成就。

同心合一的苦勸   

親愛的兄姊,教會就是這個世界上,持守這三個和平內容的所在。咱拒絕簡單的路,堅持信靠那位「道成作人」的上帝,就是無容允去掉人性,只有講抽象概念;在教會內底,無分內外、是自己人或是局外人,佇舉行洗禮的時,牧師叫咱個人的名,奉三位一體真活上帝的名,為咱行洗禮;在聖餐內底,耶穌的身體為咱擘開,祂的血為咱來流。咱透過日常實際的行動,更較專心佇主耶穌的生命、祂的受死及復活,這攏欲成作咱的和平,並且真實變成咱每一個人,參與佇內面的生命故事。   

就親像保羅上尾講,「因為基督差我,呣是欲行洗禮是欲傳福音,不在言語的智慧,驚了基督的十字架歸佇空空。」(林前1:17)咱要記得咱是按怎受呼召。真多教會真強調受洗的人數,有教會牧者訂定目標,喊到一千。總是咱卻要記得,教會的存在,呣是欲強調咱的會堂多大間,受洗禮的人數有多少人;韓國首都有一間光鹽教會,這間教會的牧者曾去過歐洲,看著真多真美又大間的教會,內底卻無人聚會,所以,伊向上帝祈禱,伊的教會無需要真大真美,總是內面一定要有基督的香味。什麼叫做基督的香味呢?就是活出耶穌基督十字架的生命,後來伊就開始光鹽教會的服事。人若欲去找這間教會找嘸,因為它的招牌真小,行過的人攏嘸看;馬鈴薯湯是韓國人國民美食,光鹽教會佇在的所在,恰好佇因的社區內底上出名賣馬鈴薯湯店仔的樓頂,有人勸因,要將招牌做較大,互外面的人好找,總是牧師卻按呢回答,假使阮的招牌真大,會防害別人作生理,咱要實行主耶穌的教示,疼厝邊親像家己;就因為這間教會的作為,致到後來,顛倒附近的厝邊,並無稱這間教會是光鹽教會,顛倒叫這間教會作馬鈴薯教會。